اول مرة احس ان اليتم بيوجع اوى كدة
اول مرة احس الامهم اوى كدة
احساس اليتم دة شىء بشع عمرى اصلا ما فكرت فية
طول عمرى لما اشوف حد يتيم يصعب عليا اوى واحاول محسسوش بحاجة
بس فكرة انى اتخيل فعلا مدى الالم الى جواة والى هو عايش فية الفكرة الجدية يعنى عمرها ما جت فى بالى
الاحساس البشع ان مافيش حضن يضمة وان مالوش ظهر فى الدنيا دى.
بس النهاردة انا حاسة الاحساس دة اوى
انت اصلك مش عارف انت اية
وانا من غيرك مش عارفة هبقى اية
لما بقلك انك اتغيرت بتضايق .. بس انت فعلا اتغيرت
مش عارفة اية الى غيرك بس حتى صوتك مبقاش زى الاول
زمان لما كنت اكلمك بمجرد انى اسمع صوتك كنت برتاح
لما كانت حاجة تزعلنى او تطلعلى مشكلة من تحت الارض مكنتش بقلق عشان عارفة انك دايما هتكون جمبى
صوتك بيطمنى واحلى حاجة فيك انك دايما عندك استعداد تسمع حتى لو كنت بلك وبهرتل وبكلمك وانا لسة صاحية من النوم وتيت تيت والشريط زى ما بتقول
عندك قوة تحمل مهولة فى انك تستحمل كل الى بعملة فيك وكل الكلام الغريب الى بيطلع منى فى الاوقات دى
وبرغم درجة غبائى الى مش طبيعية (يالهويييييييي هو فية غباء كدة يا جدعان) فانت برضة بتحبينى من غير ما تكون عايز حاجة ولا عشان اعرفك على المزز صحابى ولا عشان تقف مع صاحبة جامدة فى الجامعة ولا تقدم السبت تلاقى الحد زى ما كل الصحاب بيعملوا اليومين دول
انت كدة ( بتحبينى للة فى للة )
لما كنت ابقى فرحانة كنت تفرحلى اكتر منى وتخاف عليا من اى حد يزعلنى زى ما اكون بنتك
ولما كنت ازعل متسبنيش غير لما تصالحنى على نفسى وتقولى الحياة حلوة متشليش فى قلبك ومتفكريش كتير
ولما احتاج لحد اول واحد بلاقية جمبى انت من غير حتى ما اسال
عمرى ما فكرت ان ممكن يجى يوم واكلمك الاقيك مش جمبى او مشغول او رصيدك خلص.
احلى اب ينصحنى واحلى اخ يصاحبنى واحلى صاحب يواسينى واحلى اهل يدفونى
كل دول كنت بلاقيهم فيك
ودايما اقول لكل الناس انك احسن صاحب فى الدنيا دى كلها
الوحيد الى ممكن يضحكنى من قلبى بجد وانا فى اسوا احوالى و فى عز حالات الاكتئاب
واكون لسة صاحية من النوم كدة وش وللا مبهدلة نفسى عياط وللا نازلة وشعرى منكوش اخر حاجة وتقولى برضة زى القمر
وتكون بتقلها بجد مش مجاملة عشان انا فعلا فى عنيك مش محتاجة حاجة تحلينى وعلى طول حلوة وزى القمر
ياترى انا لسة حلوة فى عنيك ولا خلاص
انا الى اتغيرت ولا عنيك هى الى شيفانى مختلفة
صوتك الى اتغير ولا انا الى سمعاة بيبعد
اية الى حصل
فجاة حاسة انى بينى وبينك اتبنى سور سد وانا متعودتش معاك على حدود
حاسة انى غريبة حاسة انى حزينة
...حاسة انى يتيـــــمة من غيــــــرك
5 comments:
ده مكنش صاحب وبس... ده كان بيعبدك
حلو الاحساس
والاجمل لو كان بجد
والاحلي وأحلي لو كان في خيالك
ربنا يوفقك
مش عارف
اقولك اية
بس دة مش يتم
اليتيم هو اللى احنا فية
قصدى اليتامى فعلا
بس فعلا اللى بيفقد حد
بيحبة
يبقى يتيم برضة
السلام عليكم ورحمه الله وبركاته
كل سنه وانتم طيبين
انا اول مرة اقرا مدونتك بس انتى اكثر من رائعه
كلماتك سلسه وموفقه
احساسك رائع
وموفقه دائما
بانتظار جديدك
فى امان الله
السلام عليكم
انا اول مرة اقرا مدونتك بس فعلا شدنى كلامك وطريقه تعبيرك
وسلاسه اسلوبك والتلقائيه الذيذة اللى فيكى
اتمنى لكى التوفيق من كل قلبى وبانتظار جديدك
وفقك الله
Post a Comment