كان نفسى ابقى ولد... طول عمرى كان نفسى ابقى ولد
اول مرة حسيت الاحساس دة كنت طفلة فى كى جى تو تقريبا . لو حكيتلكوا الموقف هتضحكوا عليا انا عارفة
بس فعلا يومها حسيت انى بكرة كونى بنت قوى ونفسى ابقى ولد
يومها كنا خارجين انا وماما وبابا واخويا الصغير وشربنا عصير وبيبسى كتير وكنا مقضيين اليوم كلة برة البيت
وفى اخر اليوم ... انتوا عارفين بقى البيبسى اشتغل . كنا خلاص مش قادرين
قام بابا خد اخويا ودخل الجامع عشان يدخلوا الحمام وماخدنيش معاة
اتنرفزت جدا و سالت ماما هو بابا خد حمادة ونسينى .. انا كمان عايزة اعمل بيبى
ابتسمت وقالتلى لا يا حبيبتى ما ينفعش" انتى بنت"
يومها حسيت بالقهر والظلم والنقص زى ما يكون هو احسن منى لمجرد ان هو ولد ولسة فاكرة الاحساس دة لحد دلوقتى وفاكرة الموقف كلة كانة امبارح وساعتها حسيت انى متغاظة ومخنوقة وقعدت اعيط
ومن يومها وانا بكرة الكلمة دى "انتى بنت "
وكل يوم بيعدى بسمعها اكتر واكرهها اكتر "انتى بنت "
عايزة اخرج ... لا الوقت اتاخر انتى بنت
عايزة اروح السنيما ... خدى اخوكى معاكى انتى بنت
هخرج مع صحابى بعد الجامعة ... دول ولاااد انتى اتهبلتى انتى بنت
مين دة ... دة صديقى زى اخويا بالظبط... عيب يا ماما انتى بنت
بيحبنى وعاجبنى والحب مش حرام... عييييييييب انتى بنت
اما اشوف صحابى فى الشارع ببقى هموت واسلم عليهم بس لاااااااااا مينفعش عشان هما ولاد وانا بنت
مش قادرة افهم لحد دلوقتى اية وجة السوء فى انى بنت
هل انا فعلا مولودة بعيب خلقى.. فيا حاجة ناقصة لمجرد انى مش ولد
ولا هى عادة توارثها المجتمع من ايام وئد البنات فاشفق علينا اننا نتدفن تحت التراب فقال ندفنهم بالحيا احسن
ولا هى شوية عادات متخلفة من ايام العصر الحجرى وخلاص
طب المطلوب منى اية دلوقت
انى اتكسف لانى بنت ولا ادورلى على راجل استخبى فية ولا اعد جمب امى فى البيت عشان انا بنت
انا بقى اخترت انى اتمرد مش هكرة نفسى عشان انا بنت
اخترت انى اخرج وارح السنيما لوحدى
اخترت ان صاحبى الانتيم يكون ولد مش بنت
اخترت انى مش عايزة ضل راجل ولا ضل حيطة وقررت انى مش محتاجة ضل اصلا انا همشى فى الشمس فى النور زى باقى البشر
اخترت انى مقضيش باقى عمرى مكسوفة من الحب بس عشان اثبت انى بنت محترمة ولو لقيت الحب الى عايزاة هحب
اخترت ان محدش لية الحق ولا حد يقدر يحكم على شرفى ولا يحاكمنى لمجرد انى قررت احب واتحب
اخترت انى اقول بحبك من غير ما اتكسف ولا اخاف
اخترت ما ادورش على راجل وخلاص لمجرد ان دى هى مهمتى فى الحياة انى اتجوز واخلف وادور على راجل استخبى فية
اخترت ادور على نفسى وعلى راحتى قبل اى شىء
اخترت اكسر كل القوانين والمحظورات الغبية الى انا محطوطة وسطيها
اخترت اتمرد اخترت اختار حياتى بمزاجى والى بيدينى مصروف يقطعة
انا مش محتاجة راجل عشان اكون كاملة لانى مش ناقصة حاجة اصلا
ومش هتجوز لمجرد الجواز لمجرد ان سنى بقى كدة ولازم كدة وهعنس لو مش كدة ولو عنست هبقى بنت مش قد كدة
هتجوز لما احب والاقى حد يمشى معايا فى الشمس فى الدفا
ولو ملقيتش الى احبة
همشى لوحدى... فى وسط الشارع
مش جمب الحيط
