زوايا السحاب

الحب والكرة وجهان لعملة واحدة

2009-03-23T23:56:00.000-07:00

لما يكون فى حد جرحك طبيعى انك تكرهة..
سواء الشخص الى جرحك دة كان شخص عادى او حد انت بتحبة
سواء كصديق او كحبيب
تبتدى تفكر فى الموقف الى انت اتجرحت فية. ساعات تعيط ساعات دمك يتحرق وتبتدى تضمر الشر -للشخص الى جرحك- اكتر وكرهك لية يزيد مع الايام
واول ما تشوفة من بعيد تحس ان فى حد نسى عود كبريت فى قلبك والحريقة جواة محدش عارف يطفيها واول ما تسمع سيرتة تحس انك عايز تضرب حد بالبوكس او تكسر اى حاجة حواليك وتقضى ايام وليالى تفكر فى الى حصل وازاى دة حصل وازاى انا كنت ساذج للدرجة دى
وتنام كل يوم وتحلم ان فية اتوبيس مدرسة خبطة (الشخص المكروة ) ولا البيت ولع وهو مربوط فى رجل السرير ولا حصلتلة اى مصيبة
وتصحى وانت فى قمة سعادتك والغل باين فى عنيك وحرقة القلب باينة فى ملامحك والمرارة والحسرة طعمها لسة على لسانك
او تحلم بية وهو مبسوط وبيضحك وتقوم مفزوع ووشك مسود وكأنك شوفت كابوس بشع .. لا كأنك لية بقى مانت فعلا شفت كابوس...!!ر

الى الناس متعرفوش ان الحب و الكرة وجهين لعملة واحدة الا وهى الاهتمام

فلو كان الحب هو المبالغة فى تقدير شخص معين و البالغة فى التفكير فية فالكرة نفس الكلام لان الاتنين نوع من المشاعر البالغ فى تقديرها
انك تحب حد لازمك وقت ومجهود وقوة اعصاب وحاجات كتير قوى ممكن نسميها طاقة
وزى ما الحب طاقة الكرة برضة طاقة
طاقة للتفكير والحقد على الشخص المكروة
وطاقة لأحتقارة وطاقة كافية للكرة فى حد ذاتة
وكميات مهولة من الدم المحروق
وبعد كل هذا الهدر الهائل للطاقة وانت متخيل ان كرهك للشخص المكروة كافية لأحتقارة وسقوطة من نظرك

فكر مرة تانية

لان كرهك للشخص المكروة اكبر دليل على انة مازال محط اهتمام منك وانة مازال يشغل حيز من تفكيرك ومن حياتك حتى لو كان هاذا الحيز فقط من اجل الكرة فهو حيز لا يستهان بة

وعشان كدة دايما بين الحب والكرة شعرة

جايز جدا الكرة الشديد يتحول لحب عن طريق الاهتمام وجايز جدا يكون حب متنكر فى صورة كرة من الاساس
وان كان خير وسيلة للاحتقار هى الصمت .. فاٍن خير وسيلة للكرة هى الامبالاة

ايوة .. الامبالاة

فلو كان عكس الحب الكرة والاتنين معناهم الاهتمام فكس الاهتمام هو الامبالاة
فحين تتحول مشاعرك لشخص من حب الى عادى .. واقل من العادى
فدة مالوش غير معنى واحد ان الحب انتهى
مش شرط تحس بكرة تجاة الشخص دة يكفى جدا انك تبتدى تحس انة عادى
انك خلاص مش مهتم تعرف هو اخبارة اية
مش مهم تعرف حياتة حلوة ولا وحشة
مش مهم تعرف هو سعيد ولا تعيس
لانك لو بتحبة او بتكرهة هتحب تعرف اخبارة اية عشان تشفق علية او تشمت فية .. تزعل عشانة او تفرح فية.. تفرح عشانة او تحقد عية فى حالة كانت احوالة تمام يعنى
لكن لما تحس فعلا ان شخص ما بالنسبالك عادى وانك حاسس نحيتة بلامبالاة بحتة

فتهانئى الحارة لك والف الف مبروك
اقدر اقلك دلوقتى انك فعلا نسيتة تماما وان الانسان دة لا يعنى لك شيئا

بحٍبك حتى لو اية حصل

2009-01-23T15:18:00.000-08:00

من الطبيعى ان لما كباية تتكسر تجيب كباية غيرها

ولما طقم كبياتك يخلصوا تشترى طقم غيرو

من الطبيعى ان لما حاجة تضيع تدور عليها او تدور على حاجة تانية تملى مكانها

لكن لما قلبك هو الى يتكسر حتة بحتة برغم محولاتك المسميتة ( لتلصيم ) كل شرخ فية اولا باول

لما تلاقية من كتر الشروخ مبقاش فية حتة سليمة

لما يكون كل يوم فى شرخ جديد وجرح جديد

هتعمل اية

هتدفن فرافيت قلبك وتعيش بالربع قلب الى باقيلك

هتدور على حد تشتيرى منة قلب جديد ... يمكن حد يرضى يبيعهولك! ء

ولا هتلزق شروخ قلبك وتسيبة فى مكانة وتعيش بقلب ميت مش عارف يحس حد

لابد من حل.... لابد من اتخاذ قرار

فى ارض اكلى اللوتس

كل شىء يتغير... لا شىء يبقى على حال

امس كان يحيط بى كل ما اتمنى

اليوم انا لا املك شيئا

امس كان معى كل ما اريد

اليوم لا اعرف حتى ما هو الذى اريدة

الوقت يمر

تتسع الفجوة

وها انا اتعفن تحت شمس ذلك اليوم الجديد

ولم اعد اعرف من انا بعد الان

يجب اتخاذ قرار محدد ... على الاقل من اجلة

فهو لن يبقى الى الابد

يحبنى حتى لو اية حصل

بالاسود

2008-12-30T15:41:00.000-08:00

ويظل الحلم قائما يقظا فى طيات عقلك

تحلم بالصبر للقاء يوم جديد تحلم بشمس يوم جديد تحلم بالنسيان ولا زلت تحلم

واذا بشمس ذلك اليوم الجديد تسقط من السماء لتاتى على كل ما هو حى

لتاكل الاخضر واليابس

لتحترق كل احلامك بنيران اليأس

واذا بكل شىء حولك يتحول الى رماد

فتعتاد المنظر... تعتاد اللون الرمادى

فانت مؤمن بان كل شىء من الرماد والى الرماد يعود

ومع مرور الوقت تكون قناعتك الخاصة بأنة لم يكن هناك الوان من الاساس

لقد كان كل شىء رمادى بالفعل.

فمن اين تاتى الالوان اذن؟ وكيف هى ان لم يكن هناك الوان من الاساس! ؟؟

فما هذا الون الذهبى الى يطيف بمخيلتى كلون خصلات شعرة

وما هذا الون الى يشبة لون عينية

هل هناك حقا الوان وان لم يكن فما هذة الالوان اذن

اهى ذكرى افقدنى اياها الفراق... ام هى اطياف لحياة سابقة

وكيف هى تلك الالوان

هل هى كتلك الورود الباهتة التى ارويها بالدمع لتبقى ذكراة

ام هى كالوان تلك الوحات التى تبدو كاطياف ذكرى معلقة على الجدران

هل كان هناك حقا الوان قبل هذا الليل المستديم

قبل ان تتوارى الشمس فى التراب

فانا ما علمت من قبل ان الشموس فى التراب تغور

هل ستاتى حقا شمس جديدة لتعيد الالوان الى الحياة من جديد

ام سيظل اللون الرمادى طاغيا على الالوان لتتحول الايام فى بطء كئيب الى ليالى يصبغها الاسود العتيم

اخيرا تااااااااااااااااج

2008-12-13T01:33:00.000-08:00

س1 : بدأت التدوين امتي؟ودخلت عالم التدوين ازاي؟
بدات التدوين من فترة تحديدا شهر 9 -2007 الفكرة كانت فى دماغى قبلها من فترة وكنت متابعة جدا لمدونات شوية ناس معرفهمش بس بيعجبنى اوى اسلوبهم وعمرى متخيلت انى ممكن يكون عندى مدونة خاصة بيا بس فى يوم كنت بقلب وسط المدونات واتكعبلت فى مدونة ابص وقلت بقى اشمعنا انا واللة لعاملة مدونة انا كمان وكانت اول بوست اكتبة احلى صاحب فى الدنيا هو الى شجعنى وكانى كان نفسى بجد اشتكى لحد منة ومش لاقية وبعدها اول حد ادانى كومينت كان صديقى محمد الجوهرى ومن ساعتها وانا من اصحاب المدونات
س2 : إيه كان إنطباعك في البداية؟
انطباعى فى البداية عن المدونين ولا التدوين عامة
واللة انا كنت شايفة المدونين شوية ناس موهوبة ومش هاممهم حد وبيكتبوا عشان حابين يكتبوا مش عشان عايزين حد يقرالهم وبس عجبتنى اوى فكرة الثقة بالنفس وان محدش همة كلام حد وكل واحد بيقول الى جواة وخلاص تحس كدة بجو مفتقد من الصراحة انطباع لذيذ يعنى
س3 : مين أكثر واحد بتحب تعليقه علي بوستك الجديد؟
كل الناس بجد يكفى ان هو اهتم كفاية انو يدينى راية اي ان كان بقى راية كويس ولا مش عاجبة الى انا كتباة بس يكفى انة اهتم وبجد دى الحاجة الوحيدة الى بتشجعنى انى اكمل وتخلينى كل ما احبط او يحصلى جفاف فكرى ابقى عايزة ارجع تانى عشان اقرا تعليقاتكوا
س4 : ايه أهم حاجة اتعلمتها من عالم التدوين؟
اتعلمت اقول الى فى نفسى هو صحيح انا كدة كدة كنت بقول الى فى نفسى بس دة ميمنعش ان التدوين خلانى اكون واثقة من نفسى اكتر وحاسة ان انا ليا صوت وممكن حد يسمعنى ودة خلى عندى امل فى شوية حاجات وحسسنى بالامان شوية يعنى مش كتير بس اهو احسن من مفيش

س5 :حاسس إن التدوين له تأثير؟
اة طبعا لية تاثير صحيح لسة مش ملحوظ بس لو ركزت هتشوفة هو لسة بطىء شوية عشان فى اولة بس اول الغيث قطرة وباقى عالحلو تكة وان شاء اللة حاجات كتير هتتغير بسبب التدوين وكدة يعنى

س6 : اذكر 5 أحلام علي الأقل تخص ماضيك وتحلم فيها بتغيير أشياء ما ماذا ستعدل؟ وماذا ستترك؟
امممممم 5 احلام صعب السؤال دة شوية
فى مواقف اكيد كان ممكن اتصرف فيها بطريقة احسن او بطريقة مختلفة لو كنت اعرف الى اعرفة دلوقتى او معايا الخبرة الى خدتها بعد المواقف دى لو رجعت بخبرتى دلوقتى ممكن اغيرها انما اكيد مش هحذفها لانى اتعلمت عمرى ما اندم على حاجة عملتها واتعلمت منا او عملتها واتبسط وانا بعملها حتى لو اتوجعت منها بعدها لان ماضى الانسان هو الى علية دلوقتى وانا دلوقتى احسن من الاول اكيد فمفتكرش انى هغير حاجات كتير لاسيما انى ممكن اجرح حد كان يستاهل انة يتجرح ومجرحتوش عشان كنت طيبة او اصاحب حد كويس ومصحبتوش عشان خدت نصيحة سيئة
يعنى اقدر اقول حاجات معملتهاش كنت اتمنى انى اعملها مش العكس

س7: اذكر 5 أحلام تخص مستقبلك؟
نفسى اخلص من الكلية الى انا فيها دى عشان بكرها بكرها بكرها بكرها ومش فاهمة فيها حاجة وادخل كلية انا بحبها1 لانى اكيد مش هخلص واعد كدة غالبا يا اما اداب اعلام او فنون جميلة قسم ديكور
2نفسى اكتب رواية او الف كتاب للاطفال واسمية حواديت عشان انا بحب اوى احكى حواديت لولاد خالتى
3نفسى احب بجد حد كويس واعرفة كويس ونتجوز ونخلف ادم وحور والى هتسرق اسم ولادى هقطملها رقبتها
4نفسى اتعلم السواقة واشترى عربية هاتش باك لونها بمبى عشان بجد حوار السواقة دة عاملى عقدة انا جبانة جدا
5نفسى اسافر باريس ولندن وتركيا ورما وامريكا وحتت كتير بس دول الاول واهم حاجة باريس

س8 :أذكر شخصين علي الأقل متواجدين في حياتك حاليا كنت تود وجودهم قبل الأن بزمن
ناس كتير اوى لو كانوا موجودين فى حياتى من زمان حياتى كانت هتبقى احلى واولهم طبعا صديقى انتيمى اخويا اللدود محروقى
وناس كتير مش هينفع اقول حد عشان لو نسيت الباقى هيزعل
(عملت فنانة فى ثانية وبستلم الاسكار وبحيى الناس كمان )
س9: منامينو مكتبهاش بقى مش مشكلتى
س10:تدبس مين في السلطانية دي
اى حد جعان ونفسة ينانا شوية يتفضل بصحة وعافية بصراحة خايفة ابعتى لحد يكون جالة قبل كدة فكلة يتفضل بقى الدعوة عامة

انت وبس الى حبيبى

2008-05-01T06:50:00.000-07:00

مقلتلكش قبل كدة انى بحبك

بحبك اوى ... عارفة انى مبقلهاش كتير بس انا بحبك اوى

صحيت النهاردة وقت الفجر وقفت فى شباكى واستنيت الشمس تطلع

بحب الوقت دة اوى .. بحب ريحة الندى

ونسمة السقعة الزيزة.. زى مايكون الجو مليان نعناع

صحيت من نومى وانا بضحك وبفكر فيك

طب انا بضحك لية دلوقتى .. مش عارفة بس مبعرفش ازعل وانا بفكر فيك.. زى ما يكون شفايفى بتبتسم اوتوماتيك لوحدها لما بفكر فيك

طلعت الشمس وريحة النعناع بقت ورد بلدى

حبيت الشمس اوى وانا معاك.. معرفش لية

مكنتش واخدة بالى قبل كدة عمرى ما حبتها كدة

يمكن عشان زيك بتنورلى حياتى

وانا واقفة فى الشباك بحلم بملامحك فى كل شعاع شمس يصحى ويلمس وشى

لقيت نفسى فجاة بغنى اغنية قديمة اوى كنت بسمعها فى الراديو زماااان

اغنية لحنها فى دماغى من ساعة ما صحيت بس ماكنتش فاكراها

فجاة لقيت لسانى بيغنسها لوحدة زى ما يكون بيغشش دماغى الكلام

وكانى انا مش انا وكانى بسمعها لاول مرة فى حياتى

انا قلبى اليك ميال.... ولا فيش غيرك عالبال

انت وبس الى حبيبى.... انت وبس الى حبيييبى

مهما يقولوا العزال

الثقب الاسود

2008-04-23T07:47:00.000-07:00

لا يوجد شىء فى الدنيا اكثر حزنا من مشاهدة من تحب يذهب بعيدا عنك.

تنظر الى المسافة تتسع بسن جسديكما ليملئها الفراغ

ليمحو كل ما كان ينبض بينكما

فيصبح مجرد فضاء واسع مجرد من اى شىء سوى ذلك الثقب الاسود الذى يبتلع كل امل لك فى الحياة دون دراية منك

فتجد انفاسك تأبى الخروج وتجد روحك خارج جسدك

فيتعارض سلوكك مع مشاعرك.

تستيقظ كل صباح لتجد نفسك تحيا وتموت فى ان واحد

ان يرحل الى الابد شعورك بالاكتمال

فتظل تتضائل تتضائل حتى تتلاشى

ليبتلعك ذلك الثقب الاسود فى فضائة الواسع

فتصبح فقاعة فذكرى فماضى لا يتذكرة احد

الراية البيضا

2008-04-13T00:25:00.000-07:00

هناك شىء مفقود بداخلى . ابحث عنة ولا اجدة
احاول معرفة ما هو فاكتشف انى لا اتنفس
لقد فقدت روحى
هل قبضها الالة ام انها هائمة حولك كشبح لكى تعيش
هل انا ميتة الان ام انى اقتات على ما بقى لى من انفاسك لكى احيا
احاول ان اتحرك ولكن جسدى يأبى الطاعة وكأن لة ارادة اخرى سوى ارادتى
اصرخ... اصرخ... ولكنى لا اسمع شيئا
هل تركنى صوتى هو الاخر وذهب اليك
هل خانتنى كل اعضائى وتركت ارضها واستسلمت للعدو
ام انها اخٍِذت اسرى بعينيك
استمع الى ذلك الصمت المطبق امقتة فى بادىء الامر ثم اعتادة .. لربما احاول ان اجد فية بعض السلام والسكينة
احملق فى سقف حجرتى... احاول ان اتزكر ابتسامتك علنى استطيع ان اخادع الموت لاسرق نفسا اخرا من الحياة
لعلك تشفق على وتفرج عن روحى من الاسر
انتظر......... وانتظر ولكنى فى النهاية ايقنت
لم تؤسر روحى ... ولم تؤخذ رهينة ولم تستسلم
لقد ذهبت اليك بملء ارادتها.
وهنا استسلمت لاخر نفس يخرج من جسدى وانا احملق فى سقف الغرفة علنى ارى وجهك لاخر مرة

ورقة بيضا

2008-01-14T21:53:00.000-08:00

صباح الخير...

ازيكوا وحشتونى بجد وحشتونى

انا عارفة انى مقصرة ومقصرة كتير كمان وتلاقى ناس كتير نسيتنى

بس سامحونى ارجوكوا

انا عارفة ان فى ناس مستنيانى اكتب وفاكرين ان التقصير منى بس واللة مش منى انا لو عليا عايزة اكتب كل يوم

بس الى محدش يعرفة ان انا مش كاتبة.. ولا بعرف اكتب ولا نيلة

انا كل الحكاية انى بكتب الى حساة

يعنى لما بحس بحاجة بقلها عالورق تقوم تطلع حلوة فكل الناس تفتكر انى انا الى كتباها

. وانا فى الحقيقة بكون بتملاها مش اكتر

انا بمسك الورقة والقلم وكل ما قلبى يقلى على حاجة هو حاسسها اكتبها من وراة واجى قوام اقلهالكوا

بس المرة دى ساكت مبيقلش شكلة عارف انى بفتن علية وباجى اقلكوا على كل حاجة عشان كدة مخاصمنى ومبقاش يحكيلى على اى حاجة

بس الظاهر كدة انة المرة دى بجد.. ساكت اوى .. فاضى اوى..حاسة انى لو اتصنت جامد مش هسمعة وهو بيدق لا هسمع الهوا وهو بيجرة جوا قلبى كانة بيت مهجور ومسكون بجميع انواع الاشباح

شكلة كدة مات ومش باقيلى منة غير مكان فاضى زكرى وشوية بوستات وورقة بيضا وقلم

عرفتة بقى ان انا كاتبة فاشلة

الكاتب الحقيقى مش لقياة يا اما مات يا اما تاية يا اما فاضى... حتى اشعار اخر

حد عايز قلب فاضى قلب طيب قلب هادى

قلب كلة حنان وعطف يخطفك من الدنيا خطف

قلب شارى مش ببيعة قلب غالى ومش هيرخص

قلب لسة فى عز ربيعة بس نفسة فى قلب مخلص

حد عايز

حد عايز قلب فاضى

قلب طيب

قلب راضى

كبرياء الفراق

2007-11-13T21:14:00.000-08:00

نظرت لة فى تكبر وعلياء وهى تحرص الا تلتقى عيناهما
وتكلمت وهى تخفى صدى الدموع فى صوتها
فلم ينتبة هو سوى لضحكاتها المغرورة
فبادلها بوداع الامبالاه واصطنع الضحكات المزيفة وعدم الاهتمام
فطغا صوت الكبرياء على صوت الصراخ
صراخ قلوبهما الدامية

____________

2007-11-09T09:35:00.000-08:00

نتعلق باشياء لا نملكها

نتعلق باشياء ماضية

لا يوجد بهذة الدنيا سوى الحزن

والحب هو ما يجعلنا نمضى

لنتذكر ابتسامة نظرة او رائحة

هل نتحمل الحزن من اجل الحب

ام نحب لنتحمل الحزن

هل يستحق الحب ان نتالم من اجلة

انة الحب هو ما يجعلنا نمضى

هو ما يجعلنا نقوم باشياء لا نقبلها فى ظل ظروف اخرى

ما يجعلنا نتنازل . نكرة . نساوم . نبكى . نفرح

ونظل نبحث ونبحث عن ذلك الحب

ذلك العذاب الذى نصبو الية بكل ما اوتينا من قوة

ونعرف حين نجدة

نراة فى زهرة زرقاء

عطر ربيعى بلون الورد

لحظة دفء فى شتاء بارد

الحب هو ما يجعلنا نتنازل عما نحب لاجل من نحب

ونترك من نحب لاننا نحبة اكثر من الحب

ولكننا احيانا بعد ان نجدة نتمنى اننا لم نجدة على الاطلاق

عذرا

2007-10-31T08:54:00.000-07:00

اسفة جدا يا جماعة على التاخير بس واللة المسالة نتية بحتة وصلة النت بتاعتى اصلها بايظة بقالها يجى اسبوعين يلا ادعولها ربنا ينتعها بالسلامة
وبالنسبة للمشروع الجديد الى عندة مشكلة عاطفية عائلية فنية اى مشكلة من اى نوع يبعتلى على
crazyl0ma@hotmail.com
وانا مش هكتب اسماء انا هكتب اول حرف من كل اسم والى عايز يقول اسمة يوضح كدة فى الرسالة وان شاء اللة اول ما النت يتصلح هنكمل المشروع
وعايزة اقترحات بالنسبة للاسم يعنى
انا ولميس وهواك
حلال العقد
وشوشة
الى عندة اسم حلو يقولة ونقرر سوا
واراكم قريبا ان شاء اللة

اقتراح

2007-10-22T04:51:00.000-07:00

يا جماعة انا كنت عايزة اقترح عليكوا اقتراح
انا معروفة بين صحابى انى حلالة المشاكل مش حلالة المشاكل اوى يعنى بس اهو لما واحدة بتكون عندها مشكلة عاطفية بحاول اساعدها وبما انى حشرية جدا بس طيبة واللة كان نفسى اساعد اكبر عدد ممكن من الناس صحيح انا زباين مدونتى مش كتير اوى يعنى بس اهو احسن من مافيش
فقلت فى عقل بالى يا بت يا لوما ما تيجى نعمل مدونة واسميها حلالة المشاكل او انا ولميس وهواك :]:] وتكون فكرتها عن ان اى حد عندة مشكلة عاطفية او غير عاطفية يحكيهالى بالتفصيل وانا احاول اساعدوا فى التفكير اصل ساعات الواحد لما بيكون واقع فى مشكلة مع حد بيحبة بيحس انة مخة واقف وعايز راى حد تانى وفى الحالة دى اكون انا موجودة
بس حبيت اخد رايكوا الاول قبل ما اعمل العملة المهببة دى ولو فى اى اقتراحات انا ديموقراطية جدا

هو وهى

2007-10-18T14:01:00.000-07:00

يختلف الحب بالنسبة للرجل عن المراة

فان المراة لغز مفتاحة كلمة الحب اما بالنسبة للرجل فالحب ضعف

فهو عند الرجل مرض خطير وعند المراة فضيلة كبرى

ولكن ضعف الرجل ياتى من طريقة استقبالة للحب

فالحب يستاذن المراة فى ان يدخل قلبها ولكنة يقتحم قلب الرجل دون استئذان

فاذا شكا لك رجل من قسوة امراة فاعلم ان قلبة بين يديها

فالحب يضاعف من رقة الرجل ويضعف من رقة المراة

حيث ان الحب ربيع المراة وخريف الرجل

ولكن من المثير للتسال لماذا يضعف الحب من رقة المراة؟؟

وذلك لان الحب بالنسبة للمراة نار مقدسة لا تشتعل امام الاصنام

فاذا احبت المراة فعلت كثيرا وتكلمت قليلا

والسبب فى تقديس المراة للحب هو ان الحب وجود امراة باكملة ولكنة ليس الا جزء من وجود الرجل

فالرجل يحب ليسعد بالحياة والمراة تحيا لتسعد بالحب

مما يجعل الحب تاريخ امراة باكملة وليس الا حادثا عابرا فى حياة الرجل

وذلك هو سبب خوف المراة من الحب

فالمراة اذا احببتك خافت عليك واذا احببتها خافت منك

فالمراة يعجبها من الرجل ان يحبها ولكن يطريها ان يشقى فى سبيلها

وكلما ذاد حبنا الى من نحب ازداد خوفنا فى ان نسىء الية

وتختلف وسيلة الحب ايضا بين الرجل والمراة

فالحب يدخل للرجل عبر العينين ويدخل للمراة عبر الاذنين

ولكن حبنا لشخص لجمالة لا يعتبر حبا ولكن حبنا لة رغم عيوبة فذلك هو الحب
وتتلخص ماساة الحب بين الرجل والمراة فى ان الرجل يريد ان يكون اول من يدخل قلب المراة

والمراة تريد ان تكون اخر من يدخل قلب الرجل

ماذا تعرف عن الحب

2007-10-11T18:58:00.000-07:00

ما الحب الا جنون فالحب جحيم يطاق لكن الحياة بدونة نعيم لا يطاق لذا تكلم هامسا عندما تتحدث عن الحب
فان الحب سلطان لذلك فهو فوق القانون
ولكن الحب لا يقتل احب انما يجعلك فقط بين الحياة والموت
غريب هو الحب يمكن ان يولد بكلمة ولكنة ابدا لا يموت بكلمة فقد قيل عن الحب انة اعمى وان المحبون لا يرون الحماقة التى يقترفون ولكن الاصح ان يكون الحب مصاب ببعد نظر فهو لا يرى الخطاء الا عندما تبتعد فان الحب هو الاكثر عذوبة والاكثر مرارة وما اقوى الحب فهو يجعل من الوحش انسانا
ومن الانسان وحشا
والسبب الذى يجعل الحب اقوى العواطف هو انة اكثرها تعقيدا
فهو يجعل الانسان العادى شاعرا ويجعل من الشاعر مجنونا ويجعل من المجنون حيوانا
ويجعل من الحيوان انسان
ويجعل من الانسان شاعرا ممايجعل الانسان حيوانا مجنونا مفترسا رقيقا شاعرا يروضة الحب فبالحب لا نعقل وبالعقل لا نحب لاننا بقلب نحب وبالعقل نكرة وبالاثنان نصاب بالجنون فبداية الحب نهاية العقل ولكن لا تولد الكراهية كما يولد الحب
فالحب يولد فى عزلة ولكن الكراهية تولد بين الناس فقد ووجد الحب لساعدة القليلين شقاء الكثيرين ولكن لا ليس الحب هو الذى يعذبنا فان من نحب هو مصدر العذاب ومن المثير للسخرية هو ان الحب الحقيقى هو ان تحب الشخص الوحيد القادر على ان يجعلك تعيسا
فالحب كالحياة لا حكمة فيها
فان الحب ليس هلوسة ولكن فية الكثير والكثير منها
والدليل على ذلك ان الذين احبوا بقوة وجنون لم يحبوا من اول نظرة
فان الحب هو اجمل سوء تقدير بين شخصين
فهو كالبحر يبتلع الكثير من الاخطاء ويعطى الكثير من الخيرات ويمحو اكبر الالام
ولكن لا يخدعك ذلك فالحب يقضى على الكثير من الالام لانة اعظمها
نعم .. انة لتناقض فان الحب مملكة من التناقضات
ولكل مملكة طاغية والغيرة هى الطاغية فى مملكة الحب
فان كان الحب هى ان تبالغ فى قيمة من تعرف فان الغيرة هى ان تبالغ فى قيمة من لا تعرف
فان الذى يحبك بقسوة انما يكرهك برفق ففى الحب ننسى كرامتنا وفى الانتقام ننسى الحب
فان الغيرة تضع الحب على باب اللاهمال والاهمال يقتل الحب والنسيان يدفنة
فالحب يجعل الزمن يمضى فلا تترك الزمن يجعل الحب يمضى
فبالرغم من عذاب الحب الا انة نعمة
فلاسف لمن لم يعرفوا الحب
ولا تاسف ان ابكاك الحب فالدموع تروى الحب والابتسامة تنعشة

انوثة متمردة

2007-09-29T21:05:00.000-07:00

كان نفسى ابقى ولد... طول عمرى كان نفسى ابقى ولد

اول مرة حسيت الاحساس دة كنت طفلة فى كى جى تو تقريبا . لو حكيتلكوا الموقف هتضحكوا عليا انا عارفة

بس فعلا يومها حسيت انى بكرة كونى بنت قوى ونفسى ابقى ولد

يومها كنا خارجين انا وماما وبابا واخويا الصغير وشربنا عصير وبيبسى كتير وكنا مقضيين اليوم كلة برة البيت

وفى اخر اليوم ... انتوا عارفين بقى البيبسى اشتغل . كنا خلاص مش قادرين

قام بابا خد اخويا ودخل الجامع عشان يدخلوا الحمام وماخدنيش معاة

اتنرفزت جدا و سالت ماما هو بابا خد حمادة ونسينى .. انا كمان عايزة اعمل بيبى

ابتسمت وقالتلى لا يا حبيبتى ما ينفعش" انتى بنت"

يومها حسيت بالقهر والظلم والنقص زى ما يكون هو احسن منى لمجرد ان هو ولد ولسة فاكرة الاحساس دة لحد دلوقتى وفاكرة الموقف كلة كانة امبارح وساعتها حسيت انى متغاظة ومخنوقة وقعدت اعيط

ومن يومها وانا بكرة الكلمة دى "انتى بنت "

وكل يوم بيعدى بسمعها اكتر واكرهها اكتر "انتى بنت "

عايزة اخرج ... لا الوقت اتاخر انتى بنت

عايزة اروح السنيما ... خدى اخوكى معاكى انتى بنت

هخرج مع صحابى بعد الجامعة ... دول ولاااد انتى اتهبلتى انتى بنت

مين دة ... دة صديقى زى اخويا بالظبط... عيب يا ماما انتى بنت

بيحبنى وعاجبنى والحب مش حرام... عييييييييب انتى بنت

اما اشوف صحابى فى الشارع ببقى هموت واسلم عليهم بس لاااااااااا مينفعش عشان هما ولاد وانا بنت

مش قادرة افهم لحد دلوقتى اية وجة السوء فى انى بنت

هل انا فعلا مولودة بعيب خلقى.. فيا حاجة ناقصة لمجرد انى مش ولد

ولا هى عادة توارثها المجتمع من ايام وئد البنات فاشفق علينا اننا نتدفن تحت التراب فقال ندفنهم بالحيا احسن

ولا هى شوية عادات متخلفة من ايام العصر الحجرى وخلاص

طب المطلوب منى اية دلوقت

انى اتكسف لانى بنت ولا ادورلى على راجل استخبى فية ولا اعد جمب امى فى البيت عشان انا بنت

انا بقى اخترت انى اتمرد مش هكرة نفسى عشان انا بنت

اخترت انى اخرج وارح السنيما لوحدى

اخترت ان صاحبى الانتيم يكون ولد مش بنت

اخترت انى مش عايزة ضل راجل ولا ضل حيطة وقررت انى مش محتاجة ضل اصلا انا همشى فى الشمس فى النور زى باقى البشر

اخترت انى مقضيش باقى عمرى مكسوفة من الحب بس عشان اثبت انى بنت محترمة ولو لقيت الحب الى عايزاة هحب

اخترت ان محدش لية الحق ولا حد يقدر يحكم على شرفى ولا يحاكمنى لمجرد انى قررت احب واتحب

اخترت انى اقول بحبك من غير ما اتكسف ولا اخاف

اخترت ما ادورش على راجل وخلاص لمجرد ان دى هى مهمتى فى الحياة انى اتجوز واخلف وادور على راجل استخبى فية

اخترت ادور على نفسى وعلى راحتى قبل اى شىء

اخترت اكسر كل القوانين والمحظورات الغبية الى انا محطوطة وسطيها

اخترت اتمرد اخترت اختار حياتى بمزاجى والى بيدينى مصروف يقطعة

انا مش محتاجة راجل عشان اكون كاملة لانى مش ناقصة حاجة اصلا

ومش هتجوز لمجرد الجواز لمجرد ان سنى بقى كدة ولازم كدة وهعنس لو مش كدة ولو عنست هبقى بنت مش قد كدة

هتجوز لما احب والاقى حد يمشى معايا فى الشمس فى الدفا

ولو ملقيتش الى احبة

همشى لوحدى... فى وسط الشارع

مش جمب الحيط

شخابيط

2007-09-19T14:55:00.000-07:00

التليفون بتاعى بايظ واتصلت بمصلحة التليفونات يجى 100 مرة ومحدش راضى يعبرنى معرفش لية.. هو انا صوتى عيالى ولا اية مش مالى عنيهم !
والتلفزيون فى رمضان مبقاش مسلى زى الاول فين ايام زمان ايام الفوازير ونيللى وبوجى وطمطم والمسلسلات الى كلها ورا بعض عالقناة الاولى كاان الوقت بيعدى متحسش بية.
مش عارفة انا الى زهقت من التلفزيون ولا هو فعلا الى بقى ممل.. واضح انى بقيت بزهق بسرعة الايام دى من كل حاجة ومفيش حاجة عجبانى
وبما ان التليفون بايظ والتلفزيون ممل واخويا محتكر الكمبيوتر عشان يكلم اصدقائة عبر القارات"اصدقائة الحريم طبعا " فانا مفيش قدامى غير وسيلة الترفية الوحيدة المعتادة الورقة والقلم
كل ما ازهق امسك اى ورقة وقلم قدامى واعد اشخبط بغيظ وغل
عارف مرة قريت ان الواحد ممكن يقرا الى جواة من خطوطة ورسوماتة
مش ضرورى يكون فنان يعنى اى شخابيط وخلاص وممكن لو حد بيفهم يعنى ممكن يترجمهالك بحاجات مدفونة جواك فعلا وانت نفسك كنت متعرفهاش
وفضل الهاجس دة مسيطر عليا فترة وبقيت اى ورقة اشخبط فيها افضل محتفظة بيها يمكن تكون بتعبر عن خاجة جوايا وانا معرفش
بس اللايام دى كل ما امسك ورقة اعد اشخبط بغيظ ونرفزة اوىوانا سرحانة معرفش لية
وبعد ما اخلص شخبطة ابص فى الورقة الاقينى من غير قصد كتبت حروف اسمك فى وسطيها...!
الظاهر كدة انك وحشتنى وانا معرفش.

لن اكون

2007-09-18T23:59:00.000-07:00

كيف نكون اذ لم ترد ان نكون
اعرف انك اذ انت تصمت ابكى انا الكلمات التى لم تقلها
واقول يحبنى بطريقتة لارحل.. وارحل بطريقتى لاحبك اكثر
انت لا تعرف كم تحزننى كلماتك خصوصا تلك التى لا تاتى
لانك تبعدنى حتى لا افهم وافهم انك تبعدنى
كان من الممكن ان اربحك لمدة اطول بالصمت
ولكنى اثرت ان اتكلم وها انا اخسرك
كان من الممكن ان انساك لو لم تطرق ابواب دهشتى بقدومك لى
والان لا اريد ان اكتب قصة حب شعرية فاشلة
ربما لاننى لا اريد ان ابقيك بين الصفحات فيما زلت اشتعل بك

زمان وانا صغير

2007-09-18T23:13:00.000-07:00

استيقظت اليوم على صوت سمسمة وعلى جملتها القديمة"انتى لسة نايمة.. اية يا بت النوم دة كلة انتى بتاجرى فى النوم ولا اية "

لم استوعب فى بادى الامر فجاء لى صوتها بعيد بعد الايام الخوالى كحلم جميل ملىء بالالحان

فتحت عيناى بكسل رغما عنهما للاجد تلك الابتسامة المعهودة التى تملا المكان خطوط وجهها وتقاسيم خدودها التفاحى وتقول لى بطريقتها المعهودة برضة "جاية افطر معاكوا النهاردة فية مانع "

قلتلها "لا تقرفينا .. قصدى تشرفينا "

تزكرت زمــان حين كنا نجتمع عند جدتى فى رمضان ونعمل نفسنا صايمين وبعد الافطار نعد نلعب لحد ما تقلب جد ونضرب بعض ونموت بعض ضرب ووقت النوم نتخانق ونعيط عشان ننام جمب بعض

تزكرت لمة العيلة فى المياتم وكنا دايما نقول "اهو احنا كدة ما نفرحش غير فى المصايب .. يا ريت يجى كل يوم عزا عشان نشوف بعض"

كم افتقد هذة الايام كم افتقد ابراءة الطفولة ودفء اللمة

لماذا نستسلم للوحدة بهذة السهولة ونسيب الدنيا تاخدنا بعيد عن الى بنحبهم

ذلك الحب النادر الوجود ذلك الحب الغير مشروط

قررت ادور على نوتتى القديمة واتصل بكل الناس ونفطر مع بعض زى زمان

اصلا مبحبكش

2007-09-18T21:09:00.000-07:00

النهاردة كان اخر يوم فى الامتحانات

قررنا نحتفل كالعادة وقعدنا نلف على مكان فاضى نكون فية لوحدنا

اللمة دى اصلها ما تتعوضش وساعات اللمة دى ربنا لا يوريهالك فبصراحة الناس بيصعبوا علينا

فضلنا نلف لحد ملقينا فى الاخر كافية جديد كدة واضح ان الناس لسة خايفة تدخولوا قلنا نجرب امرنا للة

دخلنا الكافية واحتلينا المكان كلة فى ثانية قعدنا نضحك ونهيس ونتريق على المراقبين واذا بواحد زى القمر امة داعية علية معرفش بقى ولا دعيالة من نظر بعض الناس يعنى اكيد هتكون دعيالة

وشغل البنات بقى ابتدى والهمهمة والضحك الى من تحت لتحت وانا ابتسمت وقعدت اتفرج عليهم مع انى فى الظروف الطبيعية بكون اول واحدة تاخد بالها من الحاجات دى

وكلهم طبعا مشغولين وهما بيتفرجوا على احدى عجائب الدنيا السبع وانا بتفرج عليهم واحدة واحدة واذا بواحدة فيهم بتتفرج عليا انا واول ما عنيا جت فى عنيها لقيتها بتقولى" للدرجة دى بتحبية"

السؤال فى حد ذاتة مبهم ومش واضح ومعرفش اصلا اية الى جابة فى بالها مع انى كنت بقاوح السرحان بالعافية على قد ما اقدر

وكان ممكن اعمل عبدة ومردش عالسؤال ودة فعلا الى كنت ناوية اعملة

بس واضح ان لسانى الى عايز قطعة كان لية ارادة غير ارادتى

ولقيتنى برد عليها بكبرياء غريب مكنتش اعرف انوا موجود جوايا

"لا انا محبتوش اوى يعنى .. انا بس كنت بحب ضحكتة"

ضحكت وقالتلى ياسلام ودة لية 4 ضحكات بقى زى ياسمين عبد العزيز

وبنفس الطريقة لقيت نفسى برد عليها زى ما يكون بتكلم وانا تحت تاثير مغنطيسى زى ما يكون بتلكك عشان اجيب سرتك

وقلتلها لا 7 ..

تعرف انت فعلا ليك 7 ضحكات

ضحكة لما بتضحك من قلبك مع حد من صحابك

وضحكة لما يكون حد بيشتغلك وانت عارف انة بيشتغلك ضحكة صفرا كدة باستظراف

وضحكة لما تكون بتشتغل حد ضحكة خبيثة كدة من تحت لتحت

وضحكة بقى لما بتبصلى من بعيد وتكون فاكرنى مش شايفاك وانا عاملة نفسى مش واخدة بالى

وضحكة وانت بتعاكسنى او بتصالحنى وتميل راسك كدة وانت بتضحك

وضحكة لما بتشفنى حلوة وعجباك وبتكون مبسوط انى حلوة وعجباك

واحلى ضحكة بقى الى بتقتلنى بجد الضحكة الى بتترسم على شفايفك لما بتشوفنى بعد ما اكون وحشاك

وعنيك بتبصلى وروحك بتجرى عليا وشفايفك راسمة احـــلى ضحكة شافتها عنيا

بحب الضحكة دى قــــوى وبحبك وانت بتضحكها قوى

بحبك لما بتكون مبسوط وتحرك كتافك كدة بحركة لا ارادية زى ما يكون بتحضننى فى خيالك

بحبك لما تفضل تقولى " واية " كل ما يخلص منى الكلام عشان ما اقفلش مع انى عارفة انك مش سامع الكلام اصلا المهم انك سامع صوتى وخلاص

بحبك لما بتبقى غيران عليا ومخبى زى العيال الصغيرة بس مش عايز تحسسنى عشان متضايقش مع انك من جواك بتموت ونفسك تخبينى فى حضنك ومتخليش حد يجى جمبى

بحبك لما تكلمنى الصبح عشان بس تقلى صباح الخير وتكون اول صوت اسمعو اول ما اصحى

بحبك لما نعد نقول هنسمى ولادنا اية

بحبك اما ابقى عارفة انك مفلس وبتشحن عشان تكلمنى كل شوية وتطمن عليا

بحبك لما تجبلى هدية من غير اى مناسبة

بحبك لما اخر صوت اسمعة قبل ما انام يكون صوتك

بحبك وانت فاهمنى من قبل حتى ما تبص فى عنيا

بحب ريحتك بحب صوتك بحب كلامك بحب مشيتك بحب نفسك بحب اديك بحب نظرتك بحب ملامحك ......... بس

هى دى بس الحاجات الى بحبها فيك

يعنى انا اصلا مكنتش بحبك اوى ولا حاجة .. عادى يعنى

النعامة

2007-09-18T20:47:00.000-07:00

لية كلنا بنزعل اوى من النعام عشان بيدفن راسة فى الرمل

على اساس ان مفيش حد فيكم حس فى مرة انة نفسة ينام بلا حراك ويسيب الزمن يردم علية يمكن همومة تدفن معاة وتموت بالحيا

ولايمكن بقى انتوا كلكوا جدعان وانا بس الى عيلة وبحس ساعات انى عايزة ادفن راسى فى الرملة يمكن الدوشة الى جواها دى تسكت شوية

مش عارفة لكن الاكيد ان كل واحد فينا جواة نعامة بس الفكرة مين هيدفن همومة ويسيبها تحت ويطلع ومين الى هيتفن مع همومة لحد ما تموت ومين الى هيتدفن هو وهمومة و هتفضل برضة قرفاة حتى فى التربة

اشتقت اليك

2007-09-18T20:30:00.000-07:00

استيقظت اليوم وانا حانقة على نفسى

فانا لم ارك امس فى احلامى

كم اشتقت اليك

اشتاق اليك اشتياقى للمطر.. اشتياقى لموج البحر.. اشتياقى لفجر جديد.. اشتياقى لنجومى اللامعات فى السماء

ماذا عنك اما زلت تتذكرنى

امازالت نظراتك متوهجة كما عهدتها

اما زالت ابتساماتك تملا الدنيا زهورا وفراشات

صدرك الدافى .. خطوط وجهك..انفاسك .. عطرك

تركتنى رغما عنى لانساك

فتركت مكانى القديم ولكن بلا جدوى

لى اصدقاء جدد الان احدهما يذكرنى بك لدية تلك الطريقة الصامتة فى الكلام

واخر يذكرنى بك عندما تجادلنى فى الحديث . واخر يذكرنى بك عندما تنظر الى وكانك تعرف تماما ما يجول فى صدرى

ولكن لا احد يملك تلك الابتسامة التى تاخذ انفاسى لتملا الدنيا طيورا ملونة وزهورا وفراشات... كم اشـتــــقت اليـــــــــــــك .

احلى صاحب فى الدنيا

2007-09-16T20:48:00.000-07:00

اول مرة احس ان اليتم بيوجع اوى كدة

اول مرة احس الامهم اوى كدة

احساس اليتم دة شىء بشع عمرى اصلا ما فكرت فية

طول عمرى لما اشوف حد يتيم يصعب عليا اوى واحاول محسسوش بحاجة

بس فكرة انى اتخيل فعلا مدى الالم الى جواة والى هو عايش فية الفكرة الجدية يعنى عمرها ما جت فى بالى

الاحساس البشع ان مافيش حضن يضمة وان مالوش ظهر فى الدنيا دى.

بس النهاردة انا حاسة الاحساس دة اوى

انت اصلك مش عارف انت اية

وانا من غيرك مش عارفة هبقى اية

لما بقلك انك اتغيرت بتضايق .. بس انت فعلا اتغيرت

مش عارفة اية الى غيرك بس حتى صوتك مبقاش زى الاول

زمان لما كنت اكلمك بمجرد انى اسمع صوتك كنت برتاح

لما كانت حاجة تزعلنى او تطلعلى مشكلة من تحت الارض مكنتش بقلق عشان عارفة انك دايما هتكون جمبى

صوتك بيطمنى واحلى حاجة فيك انك دايما عندك استعداد تسمع حتى لو كنت بلك وبهرتل وبكلمك وانا لسة صاحية من النوم وتيت تيت والشريط زى ما بتقول

عندك قوة تحمل مهولة فى انك تستحمل كل الى بعملة فيك وكل الكلام الغريب الى بيطلع منى فى الاوقات دى

وبرغم درجة غبائى الى مش طبيعية (يالهويييييييي هو فية غباء كدة يا جدعان) فانت برضة بتحبينى من غير ما تكون عايز حاجة ولا عشان اعرفك على المزز صحابى ولا عشان تقف مع صاحبة جامدة فى الجامعة ولا تقدم السبت تلاقى الحد زى ما كل الصحاب بيعملوا اليومين دول

انت كدة ( بتحبينى للة فى للة )

لما كنت ابقى فرحانة كنت تفرحلى اكتر منى وتخاف عليا من اى حد يزعلنى زى ما اكون بنتك

ولما كنت ازعل متسبنيش غير لما تصالحنى على نفسى وتقولى الحياة حلوة متشليش فى قلبك ومتفكريش كتير

ولما احتاج لحد اول واحد بلاقية جمبى انت من غير حتى ما اسال

عمرى ما فكرت ان ممكن يجى يوم واكلمك الاقيك مش جمبى او مشغول او رصيدك خلص.

احلى اب ينصحنى واحلى اخ يصاحبنى واحلى صاحب يواسينى واحلى اهل يدفونى

كل دول كنت بلاقيهم فيك

ودايما اقول لكل الناس انك احسن صاحب فى الدنيا دى كلها

الوحيد الى ممكن يضحكنى من قلبى بجد وانا فى اسوا احوالى و فى عز حالات الاكتئاب

واكون لسة صاحية من النوم كدة وش وللا مبهدلة نفسى عياط وللا نازلة وشعرى منكوش اخر حاجة وتقولى برضة زى القمر

وتكون بتقلها بجد مش مجاملة عشان انا فعلا فى عنيك مش محتاجة حاجة تحلينى وعلى طول حلوة وزى القمر

ياترى انا لسة حلوة فى عنيك ولا خلاص

انا الى اتغيرت ولا عنيك هى الى شيفانى مختلفة

صوتك الى اتغير ولا انا الى سمعاة بيبعد

اية الى حصل

فجاة حاسة انى بينى وبينك اتبنى سور سد وانا متعودتش معاك على حدود

حاسة انى غريبة حاسة انى حزينة

...حاسة انى يتيـــــمة من غيــــــرك